ЦЭНТР БЕЛАРУСКАЙ ДРАМАТУРГІІ распачынае прыём заявак на ўдзел у IV Міжнароднай драматургічнай лабараторыі, якая пройдзе з 20 па 26 красавіка 2015 года.
Выязная лабараторыя Цэнтра беларускай драматургіі праводзіцца з 2012 года з мэтай папулярызацыі нацыянальнай драматургіі і падтрымкі маладых аўтараў. Апроч пастановак на беларускай сцэне, п’есы лабараторыі трапляюць у шорт-лісты вядучых драматургічных фэстаў (Фэст маладой драматургіі “Любимовка”, міжнародны фэст моладзевых тэатраў “Действующие лица”, міжнародны “Волошинский конкурс”).
За час трохгадовай працы Міжнароднай драматургічнай лабараторыі быў выяўлены шэраг праблем звязаных менавіта з пастаноўкай п’ес, сярод якіх — адсутнасць упэўненасці адміністрацыі тэатраў у тым, што гледачу будуць цікавы спектаклі па п’есах маладых беларускіх драматургаў. У сувязі з гэтым лабараторыя-2015 ставіць перад сабой задачу вывучэння зацікаўленасці гледача на шляху ад напісання п’есы да яе ўвасаблення на сцэне. Рашэннем дадзенай задачы з’яўляецца правядзенне адкрытых чытанняў п’ес у гарадской прасторы, і рэалізацыя Інтэрнэт-галасаванні з прыцягненнем шырокай глядацкай аўдыторыі. Выяўленне тэматычнага поля, абранага гледачамі, дапаможа як аўтарам у пошуках аўдыторыі, так і тэатрам у выбары актуальных п’ес.
Куратарам лабараторыі-2015 стане Міхаіл Угараў, расійскі драматург, рэжысёр, сцэнарыст, удзельнік аргкамітэта і адзін з арганізатараў фэсту маладой драматургіі “Любимовка”, мастацкі кіраўнік Тэатра.doc.
Арганізатарамі IV Міжнароднай драматургічнай лабараторыі выступаюць Цэнтр беларускай драматургіі, Інтэрнэт-часопіс і тэатральнае агенцтва “Культпросвет”, Фонд “Ідэя”. Генеральны медыяпартнёр — партал TUT.by.
Умовы для ўдзелу
Для ўдзелу ў адборы неабходна да 1 красавіка адправіць на адрас cbdrr@yandex.ru матывацыйны ліст (не больш за 1200 знакаў) у вольнай форме. У матывацыйным лісце неабходна паказаць прычыны, якія падахвочваюць аўтара прыняць удзел у Лабараторыі. Пры наяўнасці рэлевантнага вопыту творчай работы, магчыма прымацаванне да матывацыйнага ліста рэзюмэ.
Патрабаванні да аўтараў: грамадзяне РБ старэйшыя за 18 гадоў, “пішучыя” людзі (па прафесіі і па прызванню) з досведам і без, гатовыя да шчыльнай працы з 20 па 26 красавіка на працягу ўсяго дня, здольныя працаваць актыўна і ў сціснутыя тэрміны, адкрытыя да ўзаемадзеяння і да пошуку формаў.
Выдаткі на пражыванне і харчаванне ў рамках Лабараторыі з 20 па 26 красавіка пакрывае Цэнтр беларускай драматургіі.
План правядзення IV Міжнароднай драматургічнай лабараторыі:
20 студзеня — 1 красавіка: прыём матывацыйных лістоў
1 красавіка — 20 красавіка: конкурсны адбор удзельнікаў лабараторыі (драматургаў і рэжысёраў, 5-7 пара)
20 красавіка — 26 красавіка: Праца адабраных удзельнікаў пад кіраўніцтвам куратараў. Працэс фіксуецца на відэа. Ствараецца “Дзённік лабараторыі”, у якім апавядаецца гісторыя працы кожнай пары, якая працуе над п’есай.
26 красавіка — 15 траўня: дапрацоўка драматургамі п’ес.
15 траўня — 15 чэрвеня: адкрытыя чытанні створаных у рамках лабараторыі п’ес з элементамі сцэнічнага дзеяння. Запіс чытанняў на відэа і запуск Інтэрнэт-галасаванні.
1 ліпеня: завяршэнне Інтэрнэт-галасаванні, вызначэнне пераможца.
1 жніўня — 30 верасня: праца над пастаноўкай п’есы-пераможца
Кастрычнік: пастаноўка спектакля, які ўвойдзе ў рэпертуар Рэспубліканскага тэатра беларускай драматургіі. Пастаноўка будзе прапанавана да пракату ў рамках Міжнароднага форума тэатральнага мастацтва “ТЕАРТ”.
Па ўсіх пытаннях можна звяртацца па адрасе cbdrr@yandex.ru, а таксама па тэлефонах:
Аляксандр Марчанка, куратар Міжнароднай драматургічнай лабараторыі
+375291365676
Вера Анціпава, PR-мэнэджар, часопіс “Культпросвет”
+375287565351
Крыніца // dramacenter.org